ഒഴുകി നിറയുന്നത്...

ഉള്ളിലേക്കൊഴുകി നിറയുവാന്‍ നീരൊഴു- 

ക്കിനിയെത്രയെന്നറിയില്ലാ.

ഓര്‍ക്കാപ്പുറത്തിടി വെട്ടാം,മഴക്കാറു

തിങ്ങിയീ മാനം കറുക്കാം.

വെളുവെളുപ്പാര്‍ന്നു ചിരിച്ച മേഘത്തിനും

മുഖമൊന്നിരുണ്ടു പോയേക്കാം ,

വിണ്ണില്‍ ചിറകടിച്ചാര്‍ത്തു പറന്നതാം

പ്രാവിനും പേടിയായേക്കാം,

മഴയേതുനേരവും കോരിച്ചോരിഞ്ഞതി.ന്‍

നേരിന്നു വേണ്ടി കരയാം .

നെഞ്ചത്തടിച്ചു വിലപിക്കുമോര്‍മ്മക.ള്‍--

ക്കുള്ളം കലങ്ങിച്ചുവന്നൂ .

.

കരകളില്‍ തല തല്ലിയാര്‍ത്തലച്ചുള്ളിലെ

കടലായ് നിറയും പുഴകള്‍,

പേടി,ഇരുട്ടും കരച്ചിലും നെഞ്ച—

ത്തടിയും ,വിലാപവുമായി,

പിന്നിലേക്കൊഴുകി തിരിച്ചു ചെന്നമ്മ തന്‍

മാറിലേക്കെത്താന്‍കൊതിപ്പൂ.

നിലാച്ചിരിച്ചേലില്‍ മറഞ്ഞു നില്‍ക്കും മിഴി –

പൊയ്കയില്‍.  പെയ്തുനിറയാന്‍

ഇനിയും മഴക്കാറു  മൂടുന്നുവോ സ്നേഹ-

സങ്കടം പെയ്തു തീര്‍ന്നില്ലേ ?